A praia de Pantín (Valdoviño) acolleu este luns a presentación da trixésima edición do Pantín Classic, o campionato de surf máis antigo e internacional de cantos se celebran en España, na que participaron representantes das diferentes institucións e empresas que colaboran na organización deste evento deportivo que, do 29 de agosto ao 3 de setembro, reunirá a algúns dos mellores surfistas do planeta.
O acto contou coa asistencia do deputado provincial Bernardo Fernández; o conselleiro de Política Social, José Manuel Rey; a directora xeral de Turismo, Nava Castro; os alcaldes de Valdoviño e Ferrol, Alberto González e Jorge Suárez, entre outras autoridades e representantes das entidades patrocinadoras do evento.
Fernández destacou “a gran magnitude” que alcanzou a competición nos seus trinta anos de historia e suliñou que foi unha das pioneiras en “promover a práctica do surf en Galicia, cando era un deporte moito menos coñecido.
Pola súa banda, Castro destacou a importante repercusión do evento a nivel turístico, e puxo de relevo a importancia de “coidar e manter o medio ambiente, posto que a natureza é o primeiro motivo polo que os turistas elixen Galicia”.
Vicente Irisarri, un dos precursores do Pantín Classic e ex alcalde de Ferrol, destacou o longo traballo realizado ao longo destas tres décadas para consolidar a competición coma unha proba de referencia a nivel mundial. “Nestes anos, pasaron moitas cousas, pero seguen presenten as ondas de sempre”, afirmou Irisarri, que apuntou que o Pantín Classic tamén serviu para “unir a mozos de todas as culturas en torno ao mar”.
