Non puido completar a selección sub-18 o pleno triunfal na primeira xornada da primeira fase do Campionato de España que se celebra en Las Palmas de Gran Canaria. O equipo dirixido por Secho non tivo un bo día en ataque ante un rival que tampouco fixo moito pero que sí aproveitou unha das súas escasas ocasións para marcar o gol que decidiu o encontro.
Foi un partido equilibrado e case sen oportunidades de gol. Galicia tiña máis a pelota, pero os canarios xogaron con moita intensidade e buscaban a contra con moito perigo. Así crearon a súa primeira oportunidade que rematou Flores cun disparo cruzado. Unha acción individual de Álex Pérez con boa resposta do porteiro canario e un remate de cabeza desviado de Álex Ramos foron as únicas opcións de gol galegas na primeira metade. Pero é que os anfitrións tampouco se achegaron moito máis á portería de Pablo Brea. A diferenza foi que no minuto 41 Marcos Lozano recibiu un pase longo cruzado, aproveitou o erro defensivo e marcou un gran gol cun remate cruzado, imparable para Brea.
Un gol que fixo dano ó equipo galego e que obrigaba a unha complicada remontada que non chegou. A Galicia costoulle moito crear perigo aínda que conforme foi avanzando o partido os intentos eran máis acentuados, pero ningunha chegada se concretaba en ocasión clara de gol.
Por contra, os canarios aproveitaban os espazos lóxicos deixados polo combinado galego para achegarse á portería de Brea, que estivo moi atinado nun par de paradas coas que mantivo vivo o partido ata o final.
Pero o empate non chegou e a Galicia quédalle agora sumar os tres puntos contra Cantabria para dese xeito chegar á segunda fase con algunha opción de clasificarse para a fase final.
\“A nivel de resultado a valoración non pode ser positiva\”, declarou José Manuel Martínez ‘Secho’, seleccionador galego, que agregou as claves para acadar un resultado positivo contra Cantabria: \“Temos que aprender e crecer mentalmente para ter a paciencia suficiente ante equipos que se pechan para non equivocarnos na toma de decisións".
